Aktualitet

Në planin konspirativ për të vrarë Kryeministrin britanik, Gordon Braun, raportohet të ketë qenë i përfshirë edhe një shqiptar nga Kosova. Mediat britanike kanë raportuar gjatë ditës së djeshme lajmin e ndalimit të një personi 29-vjeçar, që besohet të jetë nga Kosova. Në dy artikuj të njëpasnjëshëm gazeta “Evening Telegraph”, duke iu referuar burimeve që po hetojnë këtë komplot, shkruan se personi i katërt i dyshuar, si pjesëmarrës në këtë konspiracion, është shqiptar. Sipas kësaj gazete, 29-vjeçari është ndaluar në shtëpinë e tij, në rrugën “Moore Street”, Normanton, si i dyshuar në përfshirjen e akteve terroriste, vepër penale e parashikuar nga Akti i Terrorizmit 2000. Hetuesit kanë në dispozicion 28 ditë për ta marrë atë në pyetje dhe për të ngritur akuzat përkatëse, ose ta lënë të lirë. Një zëdhënës i “Greater Manchester Police”, i konfirmoi gazetës “Shqip” ndalimin e një personi, por nuk ka pranuar të komentojë për nacionalitetin e tij. “Ne nuk mund të komentojmë nacionalitetin e një personi të ndaluar, i cili po merret në pyetje për aq kohë sa ndaj tij nuk është ngritur ende ndonjë akuzë konkrete”, ka thënë ai. Mësohet se policia ka kontrolluar banesën e personit të ndaluar dhe ka sekuestruar dy makina të parkuara përpara shtëpisë së tij, ku banonte ai. Arrestimi personit, që thuhet të jetë me origjinë nga Kosova, është kryer nga policia e zonës së Lancashire, në bashkëpunim me skuadrën e antiterrorizmit në policinë e Greater Mançester. Burimet policore kanë pohuar për median angleze se arrestimet kanë të bëjnë me një konspiracion për vrasjen e kryeministrit Gordon Braun dhe paraardhësit të tij Tony Blair. Gazetarët e “Evening Telegraph”, gazetë lokale e zonës ku jetonte kosovari, kanë nisur kërkime të “ethshme” për t‘i zbuluar emrin dhe të mësojnë më shumë për të. Fareed Hussain, anëtar i një forumi mysliman i zonës Derbi, ka pohuar se ai nuk ia dinte emrin e kosovarit të ndaluar. “Ne nuk kemi informacion rreth tij. E vetmja gjë që ne dimë është se ai është kosovar”, ka pohuar ai. Tre britanikë, me origjinë myslimane, kanë dalë dje përpara gjykatave londineze si të akuzuar për kërcim dhe eliminim të kryeministrit Gordon Braun dhe ish-kryeministrit Tony Blair. Krahas kësaj akuze, të katërt akuzohen si pjesëtarë të Al-Kaedës, për degën e Britanisë së Madhe, duke inkurajuar persona të tjerë për t‘iu bashkuar kësaj organizate.

Shoqata Ndërkombëtare e Prokurorëve është mbledhur në Singapor për të diskutuar mbi mënyrat se si të luftohet krimi në internet. Në takim mori pjesë edhe Kryeprokurorja shqiptare, Ina Rama, e cila ndahu opinionet se si të luftohet ky fenomen që sjell terrorizmin, manipulimin e të dhënave dhe të llogarive bankare, vjedhjet me mashtrim të klientëve që bëjnë blerje përmes internetit apo përdorimi i internetit prej pedofilëve dhe konsumuesve të pornografisë me fëmijë. "Në forumet dhe grupet e punës u diskutua për thellimin e bashkëpunimit rajonal dhe ndërkombëtar, sepse krimi kompjuterik nuk njeh kufij dhe se shpesh në të janë të përfshirë shumë persona që jetojnë në vende të ndryshme dhe komunikojnë përmes internetit", tha dje Prokuroria e Përgjithshme. Sipas saj, ky krim me përmasa globale kërkon edhe një përgjigje globale nga ana e organeve të ndjekjes ligjore. "Përvoja ka treguar se kriminelët dhe terroristët mund të bllokojnë përmes viruseve edhe funksionimin e pjesëve të tëra të administratës dhe të shtetit, puna e të cilëve sot nuk mund të konceptohet pa përdorimin e kompjuterit", vazhdon njoftimi. Sipas akuzës qendrore, në takimet e grupeve të punës u ngrit nevoja e krijimit të institucioneve shtetërore të specializuara për ekspertizën e krimit kompjuterik (cybercrime), si dhe e specializimit dhe profilizimit të prokurorëve dhe të oficerëve të policisë gjyqësore për hetimin e krimeve në këtë fushë. Në takim u konstatua se rritja e jashtëzakonshme e numrit të kompjuterëve dhe e përdoruesve të internetit, si dhe zhvillimi i teknologjisë dhe ekonomisë elektronike, ka çuar edhe në shtimin e jashtëzakonshëm të krimeve në këtë fushë. "Për këtë edhe krijimi i njësive të specializuara për ndjekjen e këtij krimi bëhet më se i domosdoshëm. Përvoja e deritanishme tregon se shpesh autorët e këtyre krimeve përdorin si mundësi për të fshehur gjurmët edhe vende të vogla, apo të tilla ku interneti nuk ka ndonjë zhvillim masiv", u ra dakord në takim. Po ashtu u theksua edhe domosdoshmëria e përshtatjes dhe e përmirësimit të legjislacionit për ndjekjen dhe ndëshkimin e krimeve të kryera përmes përdorimit të teknologjisë së informacionit si nëpërmjet detajimit të veprave penale të veçanta dhe sanksioneve të tyre, edhe nëpërmjet parashikimeve specifike për marrjen dhe administrimin e provave gjatë hetimit të këtyre veprave. 

Gjithashtu, pavarësia dhe paanshmëria e prokurorëve në ushtrimin e detyrës ishte tema tjetër e rendit të ditës të takimit ndërkombëtar të Singaporit. Kryeprokurorja shqiptare, Ina Rama, pati edhe takime të veçanta me prokurorë të rajonit, si dhe me prokurorë të vendeve ku ka emigracion të madh nga Shqipëria. Takimet u fokusuan në forcimin e bashkëpunimit dhe këmbimit të informacioneve me interes reciprok.

Një papërgjegjshmëri qytetare ka provokuar një zjarr masiv shumë afër Kalasë së Krujës. Përpjekjet për të shuar zjarrin kanë qenë të mëdha dhe të vështira, ndërsa autori i zjarrvënies është ndaluar disa orë më pas. Më shumë se katër hektarë ullishte dhe shkurre janë djegur si pasojë e hedhjes së shkujdesur të një bishti cigareje në një nga oborret e një banese në lagjen "Boja" të qytetit të Krujës. I ndaluari është shtetasi Shkëlqim Baruni, 36 vjeç, nga qyteti i Krujës. Ndërkohë, në shuarjen e zjarrit janë angazhuar jo vetëm zjarrfikësit, po dhe forca të policisë, ushtrisë dhe banorë të lagjes së rrezikuar. Lagjja është e thepisur dhe kjo e ka bërë thuajse të pamundur ndërhyrjen në disa zona. Zjarri ka rënë pasditen e së shtunës dhe ka vazhduar edhe përgjatë së dielës, i favorizuar nga era. Banorët e lagjes në jug të kalasë, së bashku me forcat policore, janë vënë menjëherë në lëvizje për të shuar zjarrin dhe mbajtur larg banesave të tyre të vëna në rrezik. Fillimisht janë shoqëruar dy persona deri në momentin kur dyshimet kanë rënë seriozisht mbi 36-vjeçarin Baruni, i cili ndërsa lëvizte nëpër lagje dyshohet të jetë autori i zjarrvënies të paqëllimtë, po që alarmoi një lagje të qytetit, duke iu afruar dhe objektit historik. Burimet policore lokale bënë të ditur se me mjete rrethanore është bërë e mundur që zjarri të lokalizohet dhe të mbahet larg shtëpive, po ka qenë shumë e vështirë shuarja e zjarrit për shkak të vendosjes gjeografike të lagjes dhe vështirësisë së zjarrfikëseve për të mbërritur sa më pranë vatrave të zjarrit. Lagjja nuk ofron infrastrukturën e nevojshme rrugore për ndërhyrje në raste të tilla emergjence. Burimet e policisë bënë të ditur se është vlerësuar në kohë situata emergjente dhe angazhimi ka qenë i plotë i të gjitha forcave civile dhe atyre me uniformë. Ndërkaq, rreth orës 23:30 të së shtunës, ndaj Shkëlqim Barunit është marrë masa e arrestit. Mësohet se rreth orës 17:30 të ditës së shtunë, 36-vjeçari ka flakur tej i shkujdesur fundin e cigares së ndezur, pa menduar se nga "ferra e vogël do të dalë lepuri i madh", që do të kërcënonte të gjithë lagjen dhe do t‘i merrte lirinë e përkohshme dhe atij vetë, deri në vlerësimin e plotë të përgjegjësisë. 

Ka guxuar edhe më parë të flasë për nevojën e bashkimit të Kosovës me Shqipërinë, por kësaj radhe, akademiku Rexhep Qosja, rendit të gjitha arsyet pse duhet të ndodhë ky bashkim. 

Akademiku thotë se është në interesin e përgjithshëm të shqiptarëve të bashkohet Kosova me Shqipërinë. Madje,sipas tij, kjo është më e pranueshme edhe për fqinjët ballkanikë. 

“Për shqiptarët është shumë më mirë të jetojnë në një shtet më të madh e më të fortë sesa në dy shtete më
të dobëta, më të varfra”, thotë akademiku Qosja, gjatë një interviste ekskluzive për “Shqip”. 

Në këtë intervistë, ai flet për Kosovën e pas 17 shkurtit, sfidat që e presin shtetin e ri, por edhe rreziqet e jashtme e të brendshme që i kanosen, qëndrimin e deritanishëm të Maqedonisë dhe Malit të Zi, por edhe të Rusisë, të cilin e konsideron “tregti politike”, punën e qeverisë “Thaçi” apo pozicionin e hershëm e të tanishëm të Shqipërisë.

Departamenti Amerikan i Shtetit publikoi raportin e tij vjetor ndërkombëtar për Liritë Religjioze. Në këtë raport, për Kosovën thuhet se Qeveria, në përgjithësi, në praktikë i ka respektuar liritë fetare.

Në raportin vjetor shtetet janë radhitur në pesë kategori, duke filluar prej shteteve ku regjimet totalitare dhe autoritare synojnë ta kontrollojnë besimin fetar dhe shprehjen, e deri te qeveritë që në masë të madhe i respektojnë liritë fetare, por bëjnë diskriminime kundër religjioneve të caktuara, duke i identifikuar ato si "kulte" ose "sekte" të rrezikshme. 

Lidhur me Kosovën, në fillim të këtij raporti, thuhet se Kushtetuta, që ka hyrë në fuqi më 15 qershor të këtij viti, siguron liri të fesë dhe ligjet e tjera dhe politikat kontribuuan, në përgjithësi, për mbajtjen e lirë të fesë. 

Në përgjithësi, në praktikë, Qeveria i respektoi liritë religjioze. Nuk ka pasur ndryshim të rëndësishëm në statusin e respektimit të lirive fetare nga Qeveria, gjatë periudhës që mbulohet nga ky raport. 

Më tutje, sipas raportit të Departamentit Amerikan të Shtetit për respektimin e lirisë fetare, dhuna shoqërore ka rënë pak, por tensionet ndërmjet komuniteteve mbeten të larta, veçanërisht pas shpalljes së pavarësisë më 17 shkurt të këtij viti. 

Megjithëqë diskriminimi shoqëror dhe dhuna duket se në përgjithësi janë të motivuara etnikisht, lidhja e ngushtë ndërmjet etnicitetit dhe religjionit e bën të vështirë të përcaktohet nëse zhvillimet ishin të motivuara nga armiqësitë etnike apo religjioze. 
Më tutje, raporti thekson se Qeveria e Shteteve të Bashkuara ka diskutuar për liritë fetare me Qeverinë, me Misionin e Kombeve të Bashkuara në Kosovë dhe me përfaqësues fetarë, si pjesë e politikës së saj gjithëpërfshirëse për të promovuar të drejtat e njeriut. 

Irani dhe Uzbekistani janë në kategorinë e "vendeve me shqetësim të veçantë", që definohet se "vendet janë angazhuar ose kanë toleruar veçanërisht shkelje të ashpër të lirisë fetare". Në kategoritë e tjera përfshihen Birmania, Kina, Koreja Veriore, Sudani, Eritreja dhe Arabia Saudite. /Radio Evropa e Lirë/