Trojan i drejtuar kah përdoruesit e Firefoxit

Rritja e vazhdueshme e popullaritet të Firefoxit siç edhe është mundur të pritet sjell deri tek interesimi i hakerëve dashakeq për këtë shfletues të uebit. Kërcënimi i fundit ka për qëllim vjedhjen e të dhënave personale nga shërbimet bankare online.

Ekspertët e kompanisë për sigurim, BitDefender, tërheqin vërejtjen se kanë zbuluar një lloj të ri të aplikacionit keqbërës, i cili shfrytëzuesve të Firefoxit ua vjedh të dhënat e përdorimit të shërbimeve bankare online.

Në BitDefender e kanë emëruar rrezikun e ri si “Trojan.PWS.ChromeInject.A”, derisa ai përdorë JavaScript-in për zbulimin e të dhënave personale nga 100 apo më shumë shërbime bankare apo monetare online siç janë shërbimet Barclays, Wachovia, Bank of America apo PayPal.

Kur të infektojë kompjuterin trojani i ri ndërron formën e vet dhe paraqitet si “Greasemonkey”, një paketë e njohur skriptash e cila Firefoxit i jep shumë mundësi shtesë.

E në fund po e përsërisim për të shumtën herë me radhë atë që e kemi thënë edhe më parë, mos i hapni të gjitha bashkëngjitjet e e-mailave të cilët kanë burime të dyshimta, mos përdorni aplikacione të pavërtetuara nga krijuesit e dyshimtë dhe gjithsesi përdorni ndonjë nga zgjedhjet kundër viruseve të cilat janë në dispozicionin tuaj.